Uşaqlıqda bir sevimli pişiyim var idi.
Soba altı qışlaqğı, yük üstü yaylağı idi. “Ağzımın tikəsini” də verməklə, onu
naz-nemətlə bəsləyirdim. Buna baxmayaraq, hazır yeməkdən, hərəkətsizlikdən əzgin-üzgün
idi. Qış günlərinin birində sevimli pişiyimiz evdən yox oldu. Onun itməsi mənə
çox pis təsir etmişdi. Darıxırdım onun üçün.
Kənd yeri idi. Evimizin yaxınlığında xırman
yeri və orada kolxoz fermaları üçün ot, saman təpilmiş samanlıqlar var idi.
Orada sərçə-quş, siçan-muş çox olurdu. Pişiyin itməsindən xeyli vaxt keçmişdi.
Yaz ayları idi. Xırmanlığın ətrafında quzu otarırdım. Samanlığın yanında yekə,
hürkək bir pişik gördüm.Əvvəl onu çölpişiyi bildim. Axı çölpişikləri çox böyük
və sağlam olurlar. Buna baxmayaraq, rəngindən, gözlərindən mənim sevimli
piçiyimə bənzəyirdi. Gözlərində mənə qarşı maraq, həsrət görünürdü. Bütün əlamətlərinə
görə öz sevimli pişiyim olduğuna inansam da, onun o böyüklükdə, o sağlamlıqda
olması məni çaşdırırdı. Yaxınlaşmaq istədim, hürkdü. Uzaqlaşmaq isdədim,
dalımca yürüdü. Bundan öz sevimli pişiyim olmasına tamam inandım. Həmin gün,
çox hürkdüyündən, olmasa da, növbəti günlərdə öz sevimli pişiyimlə qovuşa
bildim. Əllərimi, üzümü yalayaraq sanki məni öpüşlərə qərq etdi. Mən də xeyli
tumarladım. Mən ondan, o da məndən doymurduq. Evə aparmaq da istədim. Lakin
düşündüm ki, bu gözəlliyi, bu sağlamlığı ona onun AZADLIĞI-özünə lazım olan hər
şeyi özü əldə etməsi vermisdir. Onu o AZADLIQdan məhrum etmək çox böyük günah
olardı. Ona görə də onu sərbəst buraxdım. Qərara gəldim ki,o gündən sevimli
pişiyimlə ancaq onun azad məkanında görüşüm. Elə də etdim. Mən ondan, o da məndən
doymurdu. Axı o da, mən də AZAD idik.
Комментариев нет:
Отправить комментарий